Kryeministri Edi Rama dhe homologu malazez Dritan Abazoviç zhvilluan një vizitë në Kiev me ftesë të Presidentit Zelensky. Gjatë konferencës së përbashkët, kryeministri Rama sulmoi sërish Bashkimin Europian duke e fajësuar për bllokimin e hapjes së negociatave. Nga ana e tij, presidenti Zelensky kërkoi nga perëndimi miratimin e shpejtë të paketës së 7-të të sanksioneve ndaj Rusisë.

Presidenti Ilir Meta emëron në Gjykatën e Lartë Margarita Buhalin dhe Enton Dhimitrin. Me emërimin e Buhalit dhe Dhimitrit, Gjykata e Lartë bëhet me 15 anëtarë nga 19 që ka në përbërje.

Ditën e sotme do të mblidhet Kuvendi në seancë plenare. Mësohet se seanca do të nisë në orën 10:00, ku pritet që të ketë diskutime për disa projektligje. Po ashtu ditën e sotme është kërkuar interpelancë nga ana e deputetit të PD-së, Ervin Salianji për ministrin e Brendshëm Bledi Çuçi.

Një përfaqësi e Aleancës për Mbrojtjen e Butrintit zhvilloi pasditen e sotme një takim informativ me Presidentin e Republikës Ilir Metën, ku i kërkuan mos dekretimin e ligjit për koncensionin e Butrintit te një fondacion privat.